Манчестер Сити го победи Брентфорд со 1:0 во реваншот од 18. коло на Премиер лигата.
Европскиот и англискиот првак славеше со голот на Ерлинг Холанд во 71. минута. Норвешкиот центарфор ја искористи големата грешка на гостинскиот стопер Кристофер Ајер и рутински погоди за важните три бода на Сити во борбата за шампионската титула. Имено, Сити со оваа победа скокна на второто место по 25 одиграни кола. Заостануваат бод зад лидерот Ливерпул и бод пред третопласираниот Арсенал.
На прес-конференцијата по натпреварот имаше еден тажен интересен момент кога тренерот Пеп Гвардиола објасни дека не треба да се критикуваат врвните напаѓачи кои не даваат гол на неколку натпревари бидејќи секогаш ќе се вратат и ќе даваат гол кога е најважно. Истовремено, тој истакна дека не е новинар, ниту некогаш би бил.
Ова поттикна еден од присутните претставници на медиумите да го праша: „Што е лошо во тоа да си новинар?“, на што Гвардиола одговори: „Јас сум менаџер. Мојот живот е подобар од твојот па... Затоа сакам да сум менаџер, а не новинар. Апсолутно“.
Сите во собата гласно се смееја, а самиот новинар подоцна изјави дека мислел дека ќе добие смешен одговор и додаде дека Гвардиола е под многу поголем притисок од него, па очигледно и двајцата се задоволни од тоа што го прават.