Неколкупати претходно имаме пишувано за тоа дека одредени видови храна ја зголемуваат продуктивноста на работното место, но денешната сторија е малку поразлична од оние претходните.
Според резултатите од истражувањето кое го спроведе Ден Ариели, бесплатната пица најмногу ги мотивира работниците да работат побрзо и подобро.
Во текот на истражувањето кое го спроведе за време на пишување на книгата „Payoff: The Hidden Logic That Shapes Our Motivations“, Ариели на работниците на Intel во Израел им прати една од три пораки. Едната група доби порака дека ако заврши добра работа, ќе добие бесплатна пица, другата група за истото ќе добие бонус од 30 долари, додека на третата ѝ беше ветено дека ќе биде пофалена кај шефот. Дел од вработените, како дел од проектот, не добија ниту една од трите пораки.
На Ариели му требаше само еден ден за да се увери дека работниците најмногу ги мотивира работниците. Според резултатите од неговото истражување, групата која добила порака дека за добро завршената работа ќе им биде дадена пица ја зголемила продуктивноста за 6,7%.
На второто место се најде групата која доби порака дека за добрата работа ќе бидат пофалени на шефот (6,6%), а групата на која ѝ беа ветени 30 долари ја покачи продуктивноста за само 4,9%. Групата која не доби никаква порака беше користена како основна мерка по која ќе се прават калкулациите.
Интересно е дека онаа група на која ѝ беше ветен паричен бонус за два дена беше 13,2% помалку продуктивна, а до крајот на неделата нивната продуктивност падна за 6,5%. На крајот од неделата продуктивноста на оние на кои им беше ветена пофалба кај шефот се изедначи со групата на која ѝ беше ветена пица.