„Тогаш сфативме што е потребно за развој на овој тим. Тоа беше еден од најнегативните моменти во мојата кариера, но и еден од највредните“, се сеќава тренерот на „Росонерите“ пред следниот натпревар во недела.
„Меаца“ ќе гори следната недела (18:00 часот), кога Милан во претпоследното коло во Серија А ја пречекува соседната Аталанта. Билетите се распродадени, ќе има 80.000 навивачи. „Росонерите“ ја преспаа претходната деценија, 11 години се без титула, но против „Божицата на провинцијата“ четата на Стефано Пиоли ќе може да направи нов чекор кон Скудетото. Четири бода во преостанатите две кола го решаваат прашањето за Скудетото и 19-тата круна за славниот клуб кој по бројот на шампионски пехари може да се израмни со градскиот ривал Интер.
Верона синоќа беше поразена на својот „Бентегоди“ со 1:3, а во преден план беа асистентот Рафаел Леау и егзекуторот, двојниот стрелец Сандро Тоноли.
„Вљубен сум во моите играчи, бидејќи секојдневно го гледам трудот што го вложуваат. Храброста и вербата доаѓаат од искуство. На пример, иако губевме, не бевме нервозни, бидејќи знаевме дека игравме добро и го задржавме тој дух до крајот. Оваа екипа се искачуваше чекор по чекор во текот на првенството. Мора да ја задржиме оваа концентрација, одлучност и верба во последните два натпревара“, рече Пиоли.
Верона е веќе минато, преокупација е дуелот со Аталанта следниот викенд.
„Мислам дека минатиот пат го одигравме еден од нашите најдобри натпревари против Аталанта, за 70-80 минути, но тие се еден од најдобрите тимови во лигата. Имаат сличен тактички пристап како Верона, па затоа е важно да ги најдеме вистинските карактеристики во нашиот тим за да ја неутрализираме силата на ривалот“.
Искусниот стручњак добро се сеќава на дебаклот во Бергамо од 5:0 на крајот на декември во 2019 година.
„Мислам дека овој Милан е роден при тој страшен и понижувачки пораз од Аталанта. Тогаш сфативме што е потребно за да се развие овој тим. Тоа беше еден од најнегативните моменти во мојата кариера, но и еден од највредните“, вели Пиоли.