Едно племе од островот Бутон во Индонезија стана хит меѓу фотографите, но и на социјалните мрежи, поради нивната необично сина боја на очи и бронзениот тен.
Домородците од племето имаат Варденбургов синдром кој влијае на пигментацијата поради што имаат необично сини очи.
Оваа појава е реткост во Индонезија, бидејќи тамошните жители најчесто имаат темна коса и темни очи, но неретко се раѓаат и со различна боја на очите. Во прашање е наследна генетска мутација за која се проценува дека во некаков облик ја има еден од 42.000 луѓе. Тој синдром може да доведе и до губење на слухот.
Геологот Корчнои Пасарибу од Џакарта неодамна ги фотографираше луѓето од племето. 38-годишниот фотограф го документира животот во рурална Индонезија, со посебен фокус на бројните племиња.
„Сините очи се уникатни и убави и тие се моја инспирација. Сината е моја омилена боја“, вели фотографот.
На островот Бутон живеат околу 450.000 луѓе од кои повеќето во мали, изолирани племиња.
