По многу одложувања, телескопот James Webb ќе биде лансиран на 24 декември

Вселенскиот телескоп James Webb (JWST), чие лансирање беше одложувано многупати, треба да биде лансиран на 24 декември, потврдија вчера НАСА и Arianespace.

„Потврдено е дека целниот датум за лансирање на вселенскиот телескоп James Webb е 24 декември во 9.20 часот од базата Куру (12 часот и 20 минути по Гринич)“, твитна Arianespace.

Тоа е најголемиот и најмоќниот телескоп во историјата, кој треба да испрати нови информации за потеклото на универзумот и копнените планети надвор од нашиот Сончев Систем.

Вселенскиот телескоп James Webb (JWST), именуван по поранешниот директор на американската вселенска агенција НАСА, е наследник на легендарниот Hubble.

Европската вселенска агенција (ESA) и нејзиниот канадски колега (CSA) соработуваа со НАСА во развојот на James Webb. Неговата конечна цена, која е тројно зголемена од оригиналната поради бројни проблеми, изнесува речиси 10 милијарди долари.

James Webb е произведен во САД, а годинава беше транспортиран до лансирањето во Француска Гвајана.

Ракетата Ariane 5 би требало да го однесе телескопот во вселената, а се проценува дека ќе биде потребен еден месец пред да стигне до својата дестинација.

Крајната цел на телескопот е да открие дали Земјата е единствената или има слични планети каде би можело да се појави и опстои живот.

Неговата орбита околу Сонцето ќе биде на 1,5 милиони километри од Земјата.

Проектот започна во 1989 година и првично беше планирано телескопот да започне со работа на почетокот на векот.