И оваа година љубителите на планинарењето го одржаа традиционалното искачување на врвот Љуботен по повод Денот на ослободувањето на Скопје од наци-фашистичката оклупација во Втората светска војна.
Шеста година по ред искачувањето е во организација на I love hiking group Macedonia. Бидејќи 13 Ноември се паѓа во работен ден (понеделник), искачувањето беше синоќа (недела).
Се тргна во 6 часот пред Железничката станица Скопје со организиран превоз до Старо Село од каде беше почетната точка на турата на 700 метри надморска височина. До врвот пауза се направи кај Планинарскиот дом „Љуботен“ (1.622 мнв).
Врвот Љуботен е висок 2.499 метри надморска височина. Иако се наоѓа на Шар Планина, неговиот снежен врв се гледа од Скопје и важи за планина која го чува овој град и затоа е и на грбот на Град Скопје.
Организаторот на планинарската тура врвот Љуботен го опишува како: „Атрактивноста на турата е во врвот, кој има форма на пирамида. Љуботен важи за малку суров врв поради тоа што претставува еден вид 'пристаниште' на Шара каде се прекршуваат сите ветришта. Љуботен е моќен, величествен и горд. И затоа Љ секогаш ќе асоцира на Љуботен“.
На врвот планинарите го развеаја знамето на Третата македонска ударна бригада, какво што партизаните носеле со себе при ослободувањето на Скопје.
Третата македонска ударна бригада била формирана во село Жегљане, Кумановско на 26 февруари 1944 година. Била формирана од баталјонот „Стив Наумов“ и кумановските баталјони „Јордан Николов - Орце“ и „Христијан Тодоровски - Карпош“. Пред ослободувањето на Скопје оваа Бригада учествувала во ослободувањето на Велес на 9 ноември, а потоа и на Тетово на 19-ти.
