Во КПД Идризово ноќеска починала 46-годишна затвореничка, родум од Србија, потврди директорот на затворот Живко Пејковски.
Починатата била осудена на 7 години и 11 месеци пoради посредување со проституција со малолетни лица, а во КПД Идризово била на издржување на казната од февруари, 2012 година.
На жената ѝ се слошило и била повикана Брза помош, но кога стигнале лекарите само ја констатирале смртта.
Директорот Пејковски негира дека и овој случај е резултат на лошите здравствени услови во затворите и тоа што во попладневните и ноќните часови нема лекар.
„Ова е петти случај од почетокот на годината, но Македонија сè уште се движи во рамките на европскиот просек, кој е 9,9 починати на 1000 лица. Починатата долго време беше носена по клиники и имаше долга историја на болести. Имаше респираторни проблеми, напади на жолчката. Но, вистинските причини за смртта ќе ги даде обдукцијата.“
Директорот Пројковски потврди дека денеска по објавување на веста во медиумите биле посетени од канцеларијата на народниот правобранител.
По констатирањето на смртта на затвореничката, случајот веднаш бил пријавен во полиција, а потоа и обвинител извршил увид.
