Најдобриот стрелец на Мундијалот 1958 во Шведска, Французинот Жист Фонтен, почина денеска во 89-тата година од животот.
Фонтен во 6 натпревари на Светското првенство во 1958 година во Шведска, единственото играно во Скандинавија, постигна дури 13 голови - рекорд што до ден денес никој на успеал да го собори. Со своите голови тогаш го засени и младиот виртуоз Пеле и неверојатниот Бразил кој за прв пат стана светски шампион.
Овој легендарен француски фудбалер иако настапи на само еден Мундијал дури до 1974 беше водечки на вечната листа на стрелци на Мундијалите, бидејќи и оние кои играа на повеќе Мундијали не можеа севкупно да постигнат повеќе голови од него. Конечно, тоа му успеа на Герд Милер кога го надмина на вечната листа со вкупно 14 голови, постигнати на Мундијалите во 1970 и 1974.
Иако 9 години беше репрезентативец на Франција, Фонтен одигра само 21 натпревар поради тоа што често беше повреден. Остана неговиот неверојатен просек на голови, со оглед на тоа што постигна 30 во националниот тим.
Нажалост мораше да се пензионира на само 28 години поради повредата која цело време му се обновуваше. На клупски план играше за Казабланка, Ница и Рамс. На вкупно 284 натпревари во сите конкуренции постигна 258 голови. За него Пеле велеше дека е еден од најдобрите фудбалери што некогаш истрчале на терен.
Беше роден на 18 август 1933 година во Маракеш, тогаш Француски Мароко, од татко Французин и мајка Шпанка. Почина во Тулуз.
