Мексиканецот Антонио Карбахал почина на 93-годишна возраст. Познат меѓу навивачите во Мексико како Ел Синко (поради неговите 5 Светски првенства). Подоцна неговиот подвиг успеаја да го повторат уште само четворица играчи, од кои тројца на последниот Мундијал во Катар.
Антонио Феликс Карбахал Родригес играше на Светските првенства во Бразил 1950 година, Швајцарија 1954, Шведска 1958, Чиле 1962 и Англија 1966.
Рекордот како единствен таков играч го држеше сѐ до појавувањето на Лотар Матеус, чие Светско првенство во Франција во 1998 година беше петто во неговата кариера настапувајќи за Германија.
Легендарниот Мексиканец одигра 48 натпревари за „Ел Три“, од кои 11 мундијалски, а на клупски план запиша 409 настапа.
Воедно, Карбахал беше последниот жив од сите фудбалери што играа на Мундијалот во 1950 година.
Поголемиот дел од својата кариера го помина во мексиканскиот клуб Леон, за кого забележа 364 настапи во текот на 16 години. Играше и за Клуб Еспања.
„Дон Антонио, легендите никогаш не умираат“, е пораката на неговиот клуб Леон.
Освен Карбахал, само четворица други играчи во историјата на фудбалот играле на 5 Светски првенства, а од нив двајца се негови сонародници - Мексиканци.
По Матеус (1982, 1986, 1990, 1994, 1998), ова достигнување го повторија Рафаел Маркес (2002, 2006, 2010, 2014 и 2018) и Андрес Гуардадо (2006, 2010, 2014, 2018 и 2022) во дресот на Мексико, како и Лионел Меси (2006, 2010, 2014, 2018 и 2022) и Кристијано Роналдо (2006, 2010, 2014, 2018 и 2022).
