Зад заклучените порти на градината во Аник, водичите ги откриваат митовите, легендите и научните факти за смртоносните растенија.
На влезот во прекрасната и бујна градина во англиската област Нортамберленд ќе видите јасен знак: на црната порта има две табли со препознатливиот симбол за отров - човечки череп пред вкрстените коски - и зборовите: „Овие растенија можат да убијат“.
Кога ќе влезете во градината, што нема да ви биде дозволено да го направите без водич, ќе имате можност да видите околу 100 озлогласени растенија убијци, а вашиот водич ќе биде загрижен за вашата безбедност и постојано ќе ве потсетува да не допирате или мирисате било кое од нив.
Откако братот на нејзиниот сопруг ненадејно починал во 1995 година, Џејн Перси станала војвотката од Нортамберленд, округ во североисточниот дел на Англија. Заедно со титулата го добила и замокот во Аник (изворно Alnwick, но се изговара Аник), а набрзо откако се вселила во ова здание сопругот ја замолил да смисли план за уредување на градината.
„Мислам дека тој си помисли: 'Тоа ќе ја замолкне, таа само ќе засади неколку рози и тоа ќе биде сѐ', раскажува Џејн. Сепак, таа направила многу, многу повеќе...
Веќе во 1996 година го ангажирала познатиот пејсажен архитект Жак Вирц. Дваесет години подоцна, градината во Аник зафаќа повеќе од 5 и пол хектари и ја посетуваат повеќе од 600.000 луѓе годишно, што ја прави најпопуларна туристичка атракција во округот.
Џејн знаела дека ако сака да направи нешто што ќе стане туристичка атракција, а не само украс зад куќата, треба да направи нешто сосема друго. Најпрво размислувала да направи „лековита“ градина, но откако ја посетила познатата градина на семејството Медичи, решила во нејзината градина да се одгледуваат растенија кои убиваат наместо што лекуваат. Сметала дека тоа е добар начин децата да се заинтересираат за ботаниката бидејќи, според неа, најмладите не ги интересира од што се направени лековите.
Едно од омилените растенија на војвотката во градината денес е Brugmansia, прекрасно цвеќе, чии сите делови се отровни, а познато е дека предизвикува парализа на мазните мускули, мигрена, дијареа, сува уста, визуелни и слушни халуцинации, мидријаза, циклоплегија и смрт.
Тука се и Strychnos nux vomica, морски коноп (рицинус), буцумис (шипки, див пенар), афион (мак), канабис, кока...