Првиот филм на режисерот Роман Полански во ерата на движењето #MeeToo зборува за човек кој се бори да си ја врати својата репутација. Главната улога во филмот„Обвинувам“ (J’accuse), ќе ја толкува францускиот актер Жан Дижарден, добитник на Оскар за филмот „The Artist“.
Филмот ја следи животната приказна на капетенот Алфред Драјфус, француски војник со европско потекло кој е обвинет дека е германски шпион. Неговото судење е еден од главните настани во Париз во 1890-тите години.
Ликот на Дижарден, полковникот Пикар преку филмската приказна ќе успее да докаже дека војникот всушност е погрешно обвинет, бидејќи е невин.
Снимањето на овој трилер со шпионски елементи е најавувано со години, првобитно под наслов „D“, меѓутоа неговото снимање беше повеќе пати одложувано. Филмот ќе се снима од 26 ноември до 7 март во Париз и околината.
85-годишниот Полански вели дека во оваа филмска приказна, за човек кој се бори да ја докаже својата невиност, всушност гледа сличност со својот живот.
„Во овој филм гледам елементи кои се слични со мојата животна приказна“, вели Полански.
Славниот режисер веќе со години е гонет од страна на американското правосудство поради силување на тинејџерка во 1977 година, па неговиот интерес за оваа приказна е очигледно од лична природа, бидејќи токму поради тој инцидент кариерата на режисерот награден со Оскар падна во сенка.