Со рачно направена ракета „Лудиот“ Мајк Хјуз проба да се лансира во вселената за еднаш и засекогаш на сите да им докаже дека Земјата е рамна. За жал, гравитацијата го врати онаму каде што припаѓа, доле на тлото.
Овој астронаут-аматер направи домашна ракета и во саботата на 24 март проба да се лансира во орбитата, но не стигна до таму, туку успеа да се дигне на нешто повеќе од 500 метри над Земјата.
За негова среќа, тој не беше повреден, иако во еден момент почна неконтролирано да паѓа бидејќи првиот падобран не беше доволно за да го забави падот. Тогаш отвори втор падобран и полека падна на тлото на пустината Мохаве, каде што се одржуваше овој настан.
Тој неколкупати претходно пробуваше да добие дозвола од властите за да се лансира во вселената, но не му беше дозволено бидејќи сакаше тоа да го направи на државно земјиште. Поради тоа, Хјуз мораше овој подвиг да го изведе во пустината Мохаве.
„Се изморив од луѓето кои ми кажуваа дека не можам да направам ракета. Навистина се изморив од тоа, па затоа собрав сили и ја направив ракетата и полетав со неа“, рече Хјуз по слетувањето.
Целиот лет траеше нешто повеќе од една минута, а 61-годишниот Хјуз патуваше со 560 километри на час пред да биде исфрлен од ракетата и да го отвори падобранот. По летот тој беше прегледан од медицинска екипа која не забележа посериозни повреди, иако напомена дека Хјуз во наредниот период ќе има болки во грбот.
„Дали верувам дека Земјата е во форма на фризби? Да, навистина верувам дека е. Дали знам со сигурност? Не. Баш поради тоа сакам да отидам во вселената и да докажам“, рече Хјуз.
Целиот лет беше снимен и ќе биде направен документарец за подвигот на бестрашниот Мајк Хјуз, кој потроши преку 20.000 долари за да ја направи неговата ракета.