Одделот за внатрешна контрола, криминалистички истраги и професионални стандарди при Министерството за внатрешни работи до Основното јавно обвинителство за гонење организиран криминал и корупција – специјализирано одделение за гонење кривични дела сторени од лица со полициски овластувања и припадници на затворска полиција, поднесе кривична пријава против Т.А., полициски службеник во Полициската станица за безбедност на патниот сообраќај Струмица поради постоење основи на сомнение дека сторил кривично дело предизвикување општа опасност по член 288 став 1 од Кривичниот законик.
Пријавениот на 29.6.2024, околу 6:20 часот, во својство на полициски службеник, напуштајќи го работното место, заминал на улицата Бетовенова, каде што се сретнал со едно лице по претходен договор за средба и во еден момент пријавениот Т.А. со службениот пиштол испукал неколкупати, со што предизвикал општа опасност за граѓаните во околината. Именуваниот полициски службеник не го пријавил настанот во СВР Струмица, повторно се вратил на работното место и по завршување на смената во СВР Струмица, се раздолжил со опремата и си заминал.
Пријавениот преку своите колеги, полициските службеници П. П. и С. Д., кои биле испратени од страна на СВР Струмица по поднесена пријава од страна на граѓанин за овој настан, се обидел да влијае за прикривање на настанот, што не било пријавено од нивна страна.
Одделот за внатрешна контрола, криминалистички истраги и професионални стандарди, во согласност со своите надлежности и овластувања, ќе поднесе предлог за поведување постапка за утврдување дисциплинска одговорност против полицискиот службеник Т. А. и ќе изрече задолжителни мерки за отстранување од работното место до завршување на дисциплинската постапка, а против полициските службеници П. П. и С. Д. ќе поднесе предлог за поведување постапка за кршење на работниот ред и дисциплината.
