Со влезот во четвртфиналето ја постигнавме минималната цел, а главната е освојување на Европското првенство, изјави германскиот фудбалски репрезентативец Тони Крос пред натпреварот со Шпанија утре од 18 часот.
![](/sites/default/files/styles/article_image_xxl/public/2024-07/5e3fcacf-79fd-4818-bc6e-cbe3b8fac2d3.jpg?itok=TaiRErg9)
Овој натпревар ќе се игра во Штутгарт и заедно со средбата меѓу Франција и Португалија може да се нарече дерби-соочување на оваа фаза од ЕУРО.
Домашната селекција Германија ќе игра против ривал кој според многумина оставил најдобар впечаток на шампионатот досега.
„Ќе повторам уште еднаш, летово ги играм последните натпревари на фудбалскиот терен. Но, верувам дека крајот нема да се случи овој петок. Како и сите во репрезентацијата, верувам во победа против силната Шпанија. Имаме голема желба. Гледаме само кон целта, кон конечниот триумф, мислам дека сме способни за тоа, без разлика кој ќе ни биде на патот“, нагласи Крос.
Легендарниот играч за врска во кариерата одигра 113 натпревари за германската репрезентација и постигна 17 голови. Германија во осминафиналето ја совлада Данска со 2:0, додека во групата беше подобра од Шкотска со 5:1 и Унгарија со 2:0, додека единствен обид без победа беше ремито 1:1 против Швајцарија.