Британската полиција потврди дека ги контактирала Астон Вила и Брентфорд за да дознае повеќе детали за прославата на голот на Оли Воткинс за време на натпреварот на двата клуба од Премиер лигата, игран викендов.
Во неделата Астон Вила на гостински терен го победи Брентфорд со 2:1, а Воткинс во 85. минута го постигна победничкиот гол против својот поранешен клуб. Тој прослави влегувајќи во голот и низ мрежата покажуваше со прстот во правец на навивач, за кој рече дека го навредувал во текот на целиот натпревар.
„Ќе стапиме во контакт со челниците на Астон Вила и Брентфорд со цел да откриеме повеќе детали“, изјави портпаролот на Метрополитен полицијата.
Прославувањето на голот на Воткинс за малку ќе предизвикаше тепачка меѓу играчите на двата тима.
„Едно лице ме навредуваше во текот на целиот натпревар, од првиот момент. Ми кажа работи од лична природа. Немаше расни навреди, но тој кажа многу работи. Мислев дека треба да му вратам. Тоа беше упатено до него, до никој друг на стадионот. Го почитувам клубот, луѓето, сопственикот, тренерот. Така им кажав кога заминував“, изјави Воткинс.
Воткинс пред месец дена беше во Скопје кога доби шанса да игра од почеток за Англија против Македонија. Секунди откако беше заменет Англичаните го постигнаа голот за израмнување (1:1).
