По повиците за бојкот откако беше потврдено дека Израел ќе учествува на овогодинешниот Избор за песна на Евровизија, сè повеќе петиции бараат „исклучување на Израел поради воените злосторства во Газа“, а Европската радиодифузна унија (ЕБУ) исто така се огласи по ова прашање.
Фински и исландски уметници, како и демонстранти во Норвешка, бараат да му се забрани на Израел да учествува на Евровизија. Тие се придружуваат на гласовите на пропалестински уметници и активисти кои се противат на учеството на земјата во изданието во 2024 година што ќе се одржи во мај во Малме, Шведска.
Од 5 декември 2023 година, кога беше официјализирано дека на Евровизија 2024 година ќе учествуваат 36 земји, меѓу кои и Израел, има сè повеќе повици за бојкот на натпреварот.
Уметниците, вклучително и Аксел Енстром, кој ја претставуваше Финска на Евровизија 2011 година, рече дека доколку Израел не биде исклучен од натпреварот, Финската радиодифузна компанија (Yle) треба да го бојкотира натпреварот и да одбие да го испрати учеството на Финска.
Авторите на петицијата, исто така, го обвинија Yle за двојни стандарди, бидејќи радиодифузната компанија беше една од првите што побара забрана за учество на Русија на Евровизија, по нејзината инвазија на Украина во 2022 година.
Европската радиодифузна унија (ЕБУ), која ја надгледува организацијата на натпреварот, повтори дека Евровизија е „аполитичен“ настан и дека Израел ги исполнува сите услови за учество.
„Натпреварот за песна на Евровизија е натпревар помеѓу јавните сервисни организации од цела Европа и Блискиот Исток кои се членки на Европската радиодифузна унија (ЕБУ)“, наведуваат во соопштението.
ЕБУ, исто така, рече дека сака да го зачува статусот на натпреварот како „аполитичен настан што ја обединува публиката ширум светот преку музиката“.
Интересно е што ЕБУ немаше ваков став кога е во прашање војната меѓу Украина и Русија, каде во февруари 2022 година донесоа одлука Русија да ја исфрли од натпреварувањето.
„Одлуката изразува загриженост дека, во светлината на кризата без преседан во Украина, вклучувањето на руско учество во овогодинешниот натпревар ќе му наштети на угледот на натпреварот“, изјавија тогаш тие.
Во мај истата година стапи на сила суспензијата на членовите на ЕБУ од Русија, поради што оваа земја го загуби правото на неопределено време да емитува и да учествува на идните Избори за песна на Евровизија.
