Врховниот суд на САД донесе пресуда дека околу половина од американската сојузна држава Оклахома им припаѓа на Домородните Американци. Случајот вклучуваше, поточно засегна и претходна пресуда за силување на дете.
Според одлуката на Судот, поголем дел од источната половина на Оклахома, заедно со вториот најголем град Тулса, треба да биде признат како резерват.
Џимси МекГирт, осуден за силување во 1997 година, го покрена случајот. Тој за да докаже оти делото се случило на територијата на Домородните Американци, цитираше историски документ што укажува која територија ѝ припаѓа на нацијата Мускоџи.
Тоа значи дека МекГирт има други, можеби поповолни услови за жалба на претходната пресуда, но и поинакви услови за идните судски процеси.
МекГирт го призна делотo и се изјасни за виновен, но според законите што ги опфаќаат Домородните Американци бараше да му суди Федерален суд, кој е единствен надлежен врз териториите на ова старо население.
Оваа одлука на Судот, значи и пониски даноци за Домородните Американци во Оклахома. Во новодефинираниот резерват, тие бројат околу 280.000 лица, т.е. 15 отсто од вкупно 1,8 милиони жители.
Петте племенски заедници од Оклахома, односно Чироки, Чикасау, Чоктау, Семиноле и Мускоџи, ја поздравија одлуката на Судот која всушност е голем чекор напред кон остварување на правата на Домородните Американци чија земја беше освоена од европските колонијалисти.
Осудениот МекГирт е член на племето Семиноле.