Двајца новинари на српската новинска агенција Бета се повредени за време на синоќешниот протест и се пренесени во Ургентниот центар во Белград.
Тие се донесени во Ургентниот центар со брза помош околу 22 часот, поради повреди здобиени за време на протестот што се одржа на платото пред српскиот Парламент.
Владимир Шкундриќ, син на Петар Шкундриќ, поранешен министер за рударство и енергетика и близок соработник на Ивица Дачиќ, беше уапсен синоќа, откако заедно со толпата демонстранти се обидоа да влезат во српскиот Парламент, пренесува Blic.
Шкундриќ беше уапсен заедно со група хулигани кои искршија прозорци на зградата на Собранието. Тој на себе имаше маска и безбол палка, пренесува Blic.
Тој веднаш ѝ кажал на полицијата дека е син на Петар Шкундриќ, кој е висок функционер на Социјалистичката партија на Србија и поранешен советник на Ивица Дачиќ, изјави изворот.
Илјадници луѓе вчера протестираа во Белград и покрај одлуката на Кризниот штаб за забрана на собири на повеќе од 10 лица на отворено.
Протестот започна мирно, но подоцна стотина агресивни демонстранти се обидоа да влезат во зградата на Собранието.
Демонстрантите фрлаа камења, факели и шишиња кон влезот на Парламентот каде беа распоредени полициски сили.
Полицијата во одговор на нападот употреби солзавец, како и во изминатите три дена додека траат протестите.
Српскиот министер за надворешни работи Небојша Стефановиќ изјави дека вечерва пред Парламентот се случуваат брутални сцени на насилство и дека полицијата морала да реагира, со цел да го заштити јавниот ред и мир и имотот.
Тој предупреди дека секој кој користи насилство ќе добие одговор од државата. Според него, овие сцени се за осуда и полицијата трпи големо насилство, но реагира правовремено и исправно.
Освен во Белград, вечерва протести се одржаа и во други градови на Србија – Нови Сад, Ваљево, Ниш, Лесковац, Пирот и Врање, поради незадоволството на граѓаните од актуелната политичка и епидемиолошка ситуација во земјата.
