Пожарот на Скопска Црна Гора што избувна денеска околу 13 часот сѐ уште е активен. Гори ниска мешана шума на околу 1.400 метри надморска височина. Поради силен ветер пожарот се шири од кумановска кон скопска страна и вечерва е видлив од Скопје.
Противпожарните екипи се на терен, а во текот на денот беше интервенирано и со авиони.
Командант на противпожарна бригада на Град Скопје Владимир Симоновски, за МИА изјави дека акцијата продолжува утре со авијација, бидејќи авионите немаат опрема за ноќно летање.
– Пожарот е активен денеска од 13:15 часот на делот на кумановска страна и сега има ветер што го носи накај Скопје. Гореше ниска мешана шума на околу 1.400 метри надморска височина. Има дежурни екипи во координација со екипи на општина Гази Баба на страна на селата Раштак и Арачиново и се прати пожарот да не дојде до населено место. Авионите беа на располагање до 17:40 часот, изјави за МИА Симоновски.
Пожарот избувна на местото Црн камен, на потегот Липково, Скопска Црна Гора и селото Матејче.
Уште еден активен шумски пожар над струшко Делогожда
Голема површина ниско стеблеста шума гори на планината Караорман над струшкото село Делогожда.
Територијалната против-пожарна единица, како што информира заменик командирот Ристе Талевски, не може да интервенира поради непристапноста на теренот.
-Теренот е непристапен. Многу е стрмно и високо. Побаравме помош од Дирекцијата за заштита и спасување да ги пушти авионите за дејствуваат од воздух, изјави Талевски за МИА.
Екипи на струшката пожарна дежураат на местото со цел да спречат ширење на огнената стихија кон селото.
Струшките пожарникари денеска интервенирале повеќе од 10 пати од кои седум на шумски пожари, три стрништа и еден објект во Вевчани.
-Апелираме до граѓаните, земјоделците и сточарите да не палат оган на отворено, бидеќи со помош на ветрот и временските услови лесно може да избега од контрола и да предизвика несакани последици . Надлежните институции да ги зачестат контролите и да ги откријат сторителите на овие несакани настани, истакна Талевски.
