Селекторот на македонската фудбалска репрезентација, Игор Ангеловски, го објави списокот на повикани играчи за претстојниот решавачки бараж против Грузија, како и последните два натпревара од Лигата на нации.
Ангеловски на списокот стави 23 играчи од кои дури четворица се голмани. Тоа е бидејќи единицата Димитриевски треба да одлежи суспсензија поради црвен картон на првиот натпревар од Лигата на нации против Естонија, а УЕФА налага да мора да има двајца резервни голмани на клупата. Против Грузија Столе ќе биде на голот бидејќи суспензијата важи само за Лигата на нации.
Како што и изјавуваше селекторот изминативе денови, на списокот се истите фудбалери и нема ниту едно ново име или изненадување. Нормално, назад во тимот е Елмас кој на минатите натпревари не беше во репрезентацијата поради позитивен тест на коронавирусот.
Од минатиот месец изоставени се Ферхан Хасани и Кристијан Тошевски. Оние кои тогаш беа накнадно додадени и сега ќе бидат во комбинација, но само доколку има потреба за што селекторот дополнително ќе извести.
Македонија на 12-ти гостува кај Грузија во „да се биде или не“ натпревар бидејќи победникот ќе избори пласман на ЕУРО. Потоа на 15-ти и 18-ти играме дома со Естонија и условно на гости со Ерменија (на Кипар), два последни натпревари од Лигата на нации.