Аргентинскиот репрезентативец никако не може да кртене глава од повреди. Сега го чека нова пауза, од околу месец дена.
Пауло Дибала синоќа мораше да го напушти теренот во „Унипол Домус“ стадионот во Каљари на 5 минути пред полувремето. Имено, Дибала се судри со домашниот тинејџер Матео Прати, по што остана да лежи на тревата, а Жозе Мурињо веднаш се фати за глава.
Се стравуваше дека го чека нова долга пауза со оглед на тоа што Дибала со солзи во очите го напушти теренот, а на негово место во игра влезе Андреа Белоти, кој потоа постигна и гол.
Среќа што повредата не е толку сериозна бидејќи Аргентинецот ги истегнал лигаментите на левото колено, повреда која бара неиграње околу еден месец, плус-минус.
Тоа значи дека отпаѓа и од репрезентацијата ан Аргентина за претстојните мундиајлски квалификации против Парагвај и Перу. Засега не е повикан друг играч на неговото место.
Инаку, Рома славеше со 4:1 над Каљари откако на двапати постигна по два брзи гола. Прво во 19. и 20. минута отворија Хусем Ауар и Ромелу Лукаку, а потоа во 51. и 59. минута Белоти и Лукаку донесоа водство од 4:0, кое го ублажи Наитан Нандес од белата точка на 3 минути пред регуларните 90 минути.