Легендарниот фудбалски стручњак и директор за фудбалски развој во ФИФА, Арсен Венгер, неодамна предложи промена на правилото за офсајд, а Marca денеска потврди дека е одобрено да продолжи да се тестира.
Венгер сугерираше дека фудбалот треба да почне да ги фаворизира напаѓачите наместо дефанзивците, како што е случајот сега, и целосно да се смени правилото за офсајд.
Според предлогот на Венгер, фудбалер би бил во офсајд позиција само доколку целото негово тело е пред последниот човек од одбраната на противничкиот тим во моментот кога додавањето е испратено до него.
Илустрацијата на идејата на Венгер можете да ја видите подолу, каде што на горната фотографијата е ситуација во која фудбалерот не би бил во офсајд, додека во случајот на долната фотографијата би бил суден офсајд.
Значи, офсајд не би бил сигнализиран доколку само еден дел од телото на напаѓачот е во линија со одбранбениот играч кога додавањето е насочено кон него, и покрај тоа што остатокот од неговото тело е поблиску до голманот.
„Венгеровиот закон“ почна да се тестира во последните месеци на турнирите за млади фудбалери во Шведска и Италија, а Меѓународниот одбор за фудбалската асоцијација (ИФАБ) одобри продолжување на неговите тестови, па извесно е дека ФИФА, која треба да ја одобри промената, ќе биде ставена во големо искушение.
Доколку се прифати предлогот на Венгер, несомнено е дека тој целосно би го променил фудбалот и играчите би морале да поминат низ тежок процес на адаптација, пред сѐ дефанзивните, бидејќи нивното движење во текот на играта би добило сосема друга димензија.
Засега е јасно дека нема да има промени во фудбалските правила до следниот февруари, кога ИФАБ повторно ќе се состане и ќе ги разгледа сите направени тестови. Тогаш ќе се дискутира за синиот картон, Венгеровото правило и многу други предлози кои пристигнуваат на адреса на оваа организација.
