Фудбалерот на Барселона, Жерар Пике, кој отворено ја поддржува независноста на Каталонија, со свирежи беше пречекан на тренингот на шпанската репрезентација во Мадрид.
Шпанските репрезентативци се подготвуваат за последните две квалификациски средби против Албанија и Израел, а главна мета на фановите е дефанзивецот на Барселона, Пике, кој гласаше на референдумот за независноста на Каталонија и кој потоа го критикуваше полициското насилство над гласачите.
Навивачите на Шпанија на тренингот му порачаа на Пике да си оди од репрезентацијата.
Обезбедувањето му наредило на еден навивач да го тргне транспарентот на кој пишувало: „Пике, ти си болен“.
Истиот навивач потоа продолжил да зборува: „Пике не заслужува да биде во составот на Шпанија. Јас само го зборувам она што го мислам. Пике е одвратен и не требаше да дојде“, рекол навивачот.
Потоа дел од навивачите кои присуствувале на тренингот извикувале: „Слобода на изразувањето“ и „Оди си“.
Бидејќи навредите кон Пике продолжиле, шпанскиот селекторот го прекинал тренингот по само 23 минути.
„Горд сум на народот на Каталонија. Ова е најлошото искуство кое сум го доживеал. Она што се случи го виде целиот свет“, рече Пике по гласањето во неделата.
Дефанзивецот на Барселона порача дека е подготвен да ја напушти репрезентацијата доколку тоа од него го побара селекторот или Фудбалскиот сојуз на Шпанија.
Пике за Шпанија има одиграно 91 натпревар, а беше дел од тимот кој го освои Светското првенство во 2010 година и Европското првенство во 2012 година. Претходно најави дека по Мундијалот во Русија ќе се повлече од националниот тим.