Фудбал

Претседателот на ФИФА доби македонски дрес

5. декември 2019 - 18:38 | Ф.З.

Претседателот на ФФМ оствари официјална средба со Џани Инфантино, првиот човек на ФИФА, во седиштето на Светската фудбалска асоцијација во Цирих при што му подари дрес од македонската фудбалска репрезентација.

Муамед Сејдини, кој е претседател на Фудбалската федерација на Македонија, на средбата со Инфантино добил потврда за поддршката која нашата федерација ја добива од ФИФА, потенцирајќи дека Светската фудбалска асоцијација ќе остане цврст партнер на ФФМ.

„Благодарност до претседателот на ФИФА, Џани Инфантино за срдечниот прием и поддршката со која уште еднаш потврдуваме дека ФИФА е цврст партнер на ФФМ и продолжува да ја поддржува нашата фудбалска стратегија“, рече Сејдини по остварената средба.

„ФИФА и претседателот Инфантино многупати досега ја искажуваа својата поддршка за Фудбалската федерација на Македонија и затоа цврсто веруваме во стратегијата и мисијата на ФИФА под водство на г-дин Инфантино. ФФМ ќе продолжи да дава придонес за идеите, сегашните и идните проекти на ФИФА кои секогаш се усмерени кон развој на фудбалот“, ФФМ ја пренесува изјавата на Сејдини.

Џани Инфантино е на чело на ФИФА од 26 февруари 2016 година, а претходно беше генерален секретар на УЕФА кој на јавноста ѝ беше најпознат како човек кој ги водеше жрепките од Лигата на шампиони. Тој е 9-тиот претседател на ФИФА.

„Разговаравме за македонскиот фудбал и проектите кои се насочени за негов развој. Ги потенциравме нашите заложби за подобрување на инфраструктурата, зголемување на фудбалската база и континуираното вложување во академиите и националните тимови. Кога ќе погледнеме наназад, гледаме и грешки. Каде што се луѓето, секогаш ќе се случуваат и грешки, но најважно е да учиме од нив. Она што без двоумење можам да го кажам е тоа што секој чекор кој ФФМ го направи во изминатата година е воден со чесна намера и во правец на развој на фудбалот. И тоа во разговорот му го кажав на г-дин Инфантино. Се разбира, голема помош добиваме од ФИФА, посебно преку програмата FIFA Forward, преку која вложуваме во развој на фудбалот“.

„Мене ми е драго што и малите федерации, како нашата, се повикани да го кажат своето мислење и сугурен сум дека можеме да најдеме решение кое ќе биде добро за сите, а претседателот Инфантино покажува дека знае да пронајде вистинска рамнотежа“.

„Од име на ФФМ благодарност до г-дин Инфантино за убавите зборови искажани за нашата Федерација и се надевам дека и во иднина ќе работиме уште повеќе за промоција и унапредување на фудбалот“, заврши претседателот на ФФМ, Муамед Сејдини.

Коментирај