Рускиот синџир ресторани „Вујко Вања“, претставуван како замена за американскиот фаст-фуд синџир McDonald’s“, според многумина, има лого исклучително слично на познатиот жолто-црвен знак на американскиот гигант, пренесува британски Independent.
Регистрацијата на трговскиот бренд „Вујко Вања“ (Дядя Ваня) била поднесена до руските власти минатата недела, се наведува. McDonald’s претходно објави дека привремено ги затвора сите 847 свои ресторани во Русија бидејќи светските брендови се соочуваат со притисок од потрошувачите да се спротивстават на инвазијата на Владимир Путин на Украина.
Претседателот на државното Собрание, Вјачеслав Володин, минатата недела објави дека „Вујко Вања“ треба да го замени McDonald’s.
Според властите во Москва, домашните угостителски фирми може да заменат 250 ресторани на McDonald’s во руската престолнина во рок од една година. Се наведува и дека Градскиот совет доделил 500 милиони рубљи (околу 4,36 милиони евра) како субвенција.
Синџирот ресторани McDonald’s во Русија повеќе од 30 години служеше како симбол на „затоплувањето на односите Исток-Запад“ по т.н. „Студена војна“.