По неколкудневна пауза поради велигденските празници, продолжија протестите на т.н. граѓанска иницијатива „За заедничка Македонија“.
И овој пат учесниците ги повикаа граѓаните на масовен протест „за да го одбранат Уставот и да не дозволат избор на претседател на Собрание кој под перница ја чува Тиранската платформа“.
Со транспаренти „Петок е денот“, најавија дека на крајот на работната недела ќе ги соопштат плановите за наредниот период. Во соопштението објавено на нивната официјална страница на социјалната мрежа Facebook тие се осврнаа и на посетата на Карл Билд .
„Денес во земјава има уште еден лажен пророк кој мисли дека може да дојде на неколку часа во земјата и да витка кичми и раце. Должност ни е да го пречекаме домаќински и да му кажеме што мислиме за таквите политичари кои нè нарекуваат Славомакедонци, и уште се толку дрски да доаѓаат тука и да сеат магла дека биле загрижени за нас. Некој кој нe сака да ни го каже ниту името и не ја осудува Тиранската платформа, нема што да бара и нуди во нашата држава“, стои во објавениот пост.
На протестот се величеше одбивањето од страна на претседателот Ѓорге Иванов да остане на цврстиот став и да не го прими шведскиот дипломат, кој, пак, претходно возврати дека е „среќен“ што го одбил, бидејќи имал многу средби со релевантни лидери. На протестот зборуваше и Елена Мисиркова која порача дека Македонија е во опасност и ги повика сите националности и малцинства да се приклучат.
