Кварталниот профит на Facebook порасна за 50% и покрај скандалот со злоупотреба на приватните податоци на корисниците. Ова се први резултати кои социјалната мрежа ги објави откако се случи скандалот.
Facebook соопшти дека приходот на компанијата во првите три месеци од оваа година пораснал на 11,9 милијарди долари, во споредба со претходниот квартал, кога изнесуваше 8 милијарди долари.
„И покрај тоа што се соочуваме со големи предизвици, нашата заедница и бизнис забележаа моќен почеток на 2018 година. Компанијата и понатаму ја анализира нашата одговорност“, изјави основачот и директор на Facebook, Марк Закерберг.
Од Facebook објавија дека приходот од огласување пораснал на 11,7 милијарди долари во трите почетни месеци од годината заклучно со март, додека приходот во истиот период минатата година изнесуваше 7,8 милијарди долари.
Facebook во март оваа година се најде во средината на голем скандал кој се однесуваше на приватните податоци на корисниците на оваа мрежа во кој беше вмешана и политичката консултантска компанија Cambridge Analytica. Од Facebook признаа дека споделиле приватни податоци на 87 милиони корисници со споменатата компанија.
Просечниот број на активни дневни корисници на Facebook во март се зголеми на 1,45 милијарди, а тоа значи зголемување од 13% во однос на истиот период минатата година. Просечниот број на месечни корисници исто така се зголеми во март за 13% и сега изнесува 2,2 милијарди. Зголемен е и бројот на вработени за дури 48% и сега Facebook на платниот список има 27.742 луѓе.
