Фудбалскиот клуб Тиверија од Струмица годинава ја прослави 100-годишнината од своето основање, а 2023 година ја заврши на најдобар можен начин - со промоција на монографијата „100 години Тиверија - еден век фудбалска историја“.
Синоќа во НУ Центар за култура „Антон Панов“ во Струмица се одржа промоција на монографијата насловена „100 години Тиверија - еден век фудбалска историја“ со која се затвори одбележувањето на 100-годишнината од формирањето на фудбалскиот клуб Тиверија.
„Направивме обемно фудбалско истражување со детална статистика, резултати, комплетни сезони, табели, фотографии, исечоци од весници, и за прв пат објавени сезони пред втората светска војна. Во оваа монографија овековечивме огромен број на поранешни фудбалери, тренери, претседатели, спортски работници и навивачи на клубот кои оставиле дел од својата младост во струмичка Тиверија“, вели коавторот Ристо Секулов, кој заедно со Аце Стојанов се творци на монографијата.
Тие упатија благодарност на издавачот Општина Струмица и градоначалникот Коста Костадинов, но и до „сите соработници кои дадоа допринос кон изработка на монографијата, а особено до големиот вљубеник во фудбалот од соседна Србија - Небојша Јаковљевиќ“.
Управата на клубот донесе одлука да се доделат бесплатни примероци од монографијата на сите фудбалери, тренери и спортски работници кои се спомнати во монографијата (подетално, за оние што има индивидуална фотографија и напишан текст) и за истите ќе следува по 1 бесплатен примерок. Доставата ќе биде во наредните денови и во првите денови од новата 2024 година.
Како клуб во сенка на попознатите Беласица и АП Брера Струмица, Тиверија денес се натпреварува во 3.МФЛ Исток, каде е на 5. место од 9 екипи, без шанси за пласман во повисок ранг. Затоа, пак, женската екипа е дел од најсилната македонска фудбалска лига и моментално е на 3. место со само три бода заостанување од водечкиот Љуботен.
