Научниците веруваат дека пронашле потенцијален противотров на моќниот отров кој се наоѓа во најотровната печурка во светот, позната како зелена пупавка.
Печурката зелена пупавка, со латинско име Amanita phalloides, е одговорна за околу 90% од смртните случаи поврзани со печурки ширум светот. Оваа печурка е распространета и во Македонија.
Нејзиниот главен отров е пептид наречен α-Аманитин, вид на аматоксин кој предизвикува откажување на црниот дроб и бубрезите.
Кинеските и австралиските истражувачи открија дека индоцијанин зелена, боја што моментално е одобрена во САД за употреба во медицинските снимки, изгледа дека ги блокира токсичните ефекти на α-Аманитинот.
Индоцијанин зелена е органско соединение кое се врзува за протеините во клетките на ракот.
Авторот на студијата, професорот Чиаопин Ван од Универзитетот Сун Јат-Сен во Гуанжу, Кина, рече дека претходно немало специфичен противотров за зелената пупавка, бидејќи знаеме малку за тоа како токсините на печурката ги убиваат клетките.
Во тестовите на глувци, како и на човечки клеточни линии во лабораторија, научниците открија дека индоцијанин зелена може да спречи оштетување на црниот дроб и бубрезите предизвикани од α-Аманитин. Исто така, ја подобрил веројатноста за преживување по труење.
„Иако резултатите се ветувачки, потребни се дополнителни клинички експерименти за да се утврди дали индоцијанин зелена има сличен ефект кај луѓето“, рече Ван, пренесува The Guardian.