Додека голем број сексуални работнички и работници во голем дел од Германија сè уште чекаат да се отворат борделите, проститутките во сојузните покраини Саксонија-Анхалт и Шлезвиг-Холштајн смеат од денеска да примат клиенти.
„За почеток, добро е што има покраини што нè вклучија во нивните планови за попуштање на мерките. Но, таа радост не треба да го прикрива фактот дека има покраини кои се бескомпромисни во однос на затворањата“, рече Јохана Вебер од Професионалното здружение за еротски и сексуални услуги.
Особено во Мекленбург-Западна Померанија, Баден-Виртемберг, Сар, Хамбург и Баварија, сè уште не е на повидок нов почеток, рече претставникот на здружението, додавајќи дека сè уште е потребен притисок врз властите во тие покраини.
Оваа индустрија, како и многу други, престана со работа во ноември. Во провинциите Хесен и Мекленбург-Западна Померанија, борделите мораа да затворат уште во март 2020 година.
Читајте повеќе>>> Отворени борделите во Берлин: Нема секс, само еротска масажа
Прекинот предизвикан од пандемијата доведе до егзистенцијални потешкотии за многу сексуални работници во земјата, при што некои се оддадоа на нелегално нудење услуги, рече претставник на професионалното здружение, истакнувајќи дека многу сексуални работници имале проблеми, на пример затоа што немале постојано живеалиште.
Другите добија помош наменета за коронавирус или надоместоци за невработеност.
Според Професионалното здружение за еротски и сексуални услуги, околу 40.000 мажи и жени се регистрирани како проститутки во Германија. Вебер претпоставува дека многу повеќе од нив работат без таканаречена картичка за заштита од проституција затоа што се плашат од професионални и приватни проблеми.
Во среда, кога е и Меѓународен ден на даватели на сексуални односи, вниманието кон состојбата на проститутките ќе се привлече главно преку онлајн настани.