Иако повеќе не игра фудбал на врвно ниво по заминувањето во американската МЛС, Лионел Меси ќе ја добие Златната топка за 2023 година, пренесуваат медиумите ширум светот повикувајќи се на Story на Instagram објавено од неговиот семеен пријател Алесандро Досети.
„Официјално е. Лео ја освои Златната топка во 2023 година. Осмата Златна топка мора да биде последна. Му беше кажано денес“, напиша Досети. Доколку неговата објава се покаже како вистинита, Аргентинецот дополнително ќе го подобри својот рекорд пред Кристијано Роналдо, кој освои пет.
Меси ја заслужи наградата благодарение на освојувањето на првата титула светски шампион во декември минатата година во Катар, каде што ја освои и титулата најдобар играч со седум гола и три асистенции. За ПСЖ на 41 настап учествуваше во исто толку голови - лично постигна 21 и асистираше за уште 20. За Интер Мајами на 13 натпревари постигна 11 гола со пет асистенции.
Негов најголем конкурент за наградата е Ерлинг Холанд, кој беше уште посмртоносен во дресот на Манчестер Сити со 52 гола и девет асистенции на 53 натпревари, освојувајќи ги титулите најдобар стрелец во Премиер лигата и Лигата на шампионите, но не учествуваше на Светското првенство во Катар, каде Норвешка не се пласираше.
