Смртоносното дивеење на вооружен маж во геј клуб и друга локација во центарот на Осло во саботата нема да ја прекине борбата за правата на сите поединци за слободен и безбеден живот, изјави норвешкиот премиер Јонас Гар Стоере.
Полицијата денеска по вторпат по апсењето го испрашуваше осомничениот, 42-годишен норвешки државјанин со иранско потекло.
Човекот, опишан од полицијата како радикализиран исламист со историја на ментална болест, е обвинет дека убил двајца и повредил 21 лице во раните утрински часови во саботата, кога Осло требаше да одржи Парада на гордоста. Говорејќи на комеморацијата во катедралата во Осло, Стоере рече дека нападот можеби го спречи одржувањето на официјална парада на гордоста, но не ја прекина борбата „против дискриминацијата, предрасудите и омразата“.
Премиерот, облечен во црно, зборуваше за илјадниците луѓе кои во саботата спонтано протестираа на улиците на Осло, веејќи знамиња во боја на виножито и положувајќи цвеќе на местото на злосторството во спомен на жртвите.
„Во текот на денот, градот беше полн со луѓе кои сакаа да зборуваат за тагата и гневот, но и за поддршка и солидарност и волја да продолжат да се борат за правото на секој поединец да живее слободен, безбеден живот“, рече тој.
„Овие злосторства нè потсетуваат на тоа. Оваа борба не е завршена. Не е ослободена од опасност. Но, ќе победиме заедно“, им порачаа тој на присутните, меѓу кои беа и принцезата Мете-Марит и министри. Катедралата беше украсена со знамиња во боја на виножито.
Адвокатот на осомничениот, Џон Кристијан Елден, не беше веднаш достапен за коментар за Reuters. Елден за TV2 изјави дека е премногу рано да се донесуваат заклучоци за мотивите или причините за нападот. Осомничениот се товари за убиство, обид за убиство и тероризам. Тој ќе биде подложен на проценка за неговата пресметливост во наредните денови, соопшти полицијата.
Сослушувањата беа кратки, изјави неговиот адвокат. „Тој не сакаше да се снима сослушувањето, ниту видео, ниту аудио, бидејќи мислеше дека полицијата ќе манипулира“, изјави Елден за TV2.
