Протестирајќи против рестрикциите за невакцинираните воведени од градот Њујорк, навивачи на Бруклин Нетс се судрија со полицијата пред почетокот на вчерашниот натпревар со Шарлот Хорнетс.
Околу 15 часот по локално време навивачите ги нападнале влезовите на „Барклејс Сентр“ арената извикувајќи „Let Kyrie play“ (пуштете го Кајри да игра) поради тоа што нивната главна ѕвезда Кајри Ирвинг не може да игра на домашните натпревари бидејќи не е вакциниран. На Ирвинг, како и на сите невакцинирани граѓани, му е забранет влезот во арената и во сите затворени јавни простори во Њујорк.
Полицијата и обезбедувањето реагирале навреме недозволувајќи им на навивачите да се пробијат до трибините. Нема пријавени повредени навивачи и полицајци, ниту пак приведени лица.
И покрај инцидентите, натпреварот почна навреме, а Бруклин без Ирвинг загуби со 95:111 од Шарлот. Ирвинг нема настап сезонава за својот тим, иако надвор од Њујорк смее да игра, но Бруклин одлучи да го суспендира поради одбивање да се вакцинира.
Тој е засега најпознатиот кошаркар кој јавно се произнесе против вакцинирањето, иако не рече дека смета дека вакцините не се добри, туку едноставно дека секој треба да има право на свој избор без да му се наметнува нешто. Неиграњето ќе му донесе и огромни финансиски загуби.
Иронично, правилото за влез во затворен простор во Њујорк не важи за гостинските кошаркари.
Во претсезоната Бруклин важеше за еден од претендентите за највисок пласман, но неиграњето на Ирвинг тоа драстично го промени.
„Да се седи овде и да се гледа како нашиот свет се дели на вакцинирани и невакцинирани е едноставно тажно. Создава голема поделба и многу конфузија. Ова што се случува не е нормално... Никој не смее да биде форсиран да прави било што со своето тело“, напиша Ирвинг во една негова објава на Instagram.