Официјалниот Twitter профил на рускиот претседател следи само 22 профила, што е прилично интересно. Уште поинтересно е кои имиња се наоѓаат на листата.
Некои профили кои Путин ги следи нема никого да изненадат, како на пример што се платформите RT и Sputnik, како и Министерството за надворешни работи на Русија. Но, меѓу оние кои ги следи Путин се профилите на Арнолд Шварценегер, Илон Маск, Барак Обама, Јенс Столтенберг и Борис Џонсон.
Вонредниот професор од Универзитетот во Мелбурн Вилијам Партлет се обиде да ја објасни ваквата листа. Верува дека со профилот на Путин најверојатно управуваат неговите соработници, но и тој самиот.
„Повеќето луѓе се склони да мислат дека тој не минува време на интернет, а ако го минува, тоа е многу малку време. Проблемот со инвазијата на Украина е тоа што тој е толку изолиран од информации па веруваше дека инвазијата ќе биде готова за два до три дена, а сега веќе влегуваме во четвртата недела“, вели Партлет за news.com.au.
Иако другите платформи како Facebook и Instagram се повеќе популарни од Twitter во Русија, Twitter се користи како дел од информациската стратегија на Кремљ.
„Според нивното сфаќање, Twitter го користат луѓе од Западот за објавување информации. Очигледно е на англиски јазик, па не е толку фокусиран на руската заедница. Колку што гледам, профилот на Путин е само начин за исфрлање информации“, смета Партлет.
Преку Twitter се обидуваат да видат колку можат да влијаат на Западот, а со следењето на Маск и западните политичари се настојува да се прикаже полегитимно на западната публика, смета професорот.
