Китовите пејат, делфините свиркаат, ракчињата испуштаат звуци на крцкање, а раите? До неодамна, научниците мислеа дека овие суштества се неми.
Најновата студија ја прекина таа тишина, или барем незнаење. Видеата откриваат дека најмалку два вида раи - Urogymnus granulatus и Pastinachus ater - од Индо-пацификот произведуваат карактеристични и впечатливи звуци.
Морскиот биолог и водач на студијата, Лахлан Фетерплејс, вели дека нивното кликнување за време на снимањето во еден момент станало толку бучно што фотографот ја испуштил камерата. Откритието веројатно немаше да биде толкаво изненадување за научниците и нуркачите доколку не поминуваа толку време со овие животни во водата, мислејќи дека не испуштаат никакви звуци.
Пред да бидат објавени резултатите од најновата студија, единственото спомнување на овие „кликови“ можеше да се најде меѓу податоците од студијата спроведена во 1970 година, кога научниците го испитуваа однесувањето на кравјите раи во заробеништво. Во таа прилика откриле дека испуштаат остри и кратки кликови, но откако ќе ги стимулираат. Сепак, иако сега имаме непобитен доказ дека раите испуштаат звуци во дивината, никому не му е јасно на кој начин.
„Тие немаат гласни жици и нема јасен механизам да укаже како го прават тоа“, објаснува Федерплејс. Меѓутоа, истражувачкиот тим забележал во видеото дека при испуштањето звуци, дупките на нејзината глава се намалуваат - што сугерира дека рибата создава некаков вид на триење помеѓу дишните патишта и околното ткиво. Исто така, можно е тие да создадат вакуум - како кога луѓето чукаат со јазикот. Што и да се случува, најверојатно ќе биде откриено наскоро, бидејќи научниците веќе планираат студии за подетално да ја испитаат анатомијата на овие морски суштества.
За целите на студијата, Фетерплејс и неговиот тим го анализирале опсегот на слух на раите. Утврдиле дека можат да ги слушнат звуците што ги испуштаат, што може да сугерира дека тоа можеби е некаква форма на комуникација меѓу нив. Паралелно со овие анализи, тие истражувале и дали коралните и лимон ајкулите - на чие мени се наоѓаат раите - исто така ги слушаат овие кликови. Одговорот е да. Сето ова укажува дека тие имаат специфична цел и служат како форма на предупредување за предаторите кои што се приближуваат.
Сепак, постои уште една можност.
Додека истражувал во заливот Џефри, Австралија, фотографот и коавтор на студијата, Хавиер Делгадо Естебан, забележал како тие најверојатно ги користат овие звуци за да повикаат засилување. Во една прилика додека нуркал со нив, слушнал како кликнува млада раја, по што ѝ се придружиле уште неколку.
Екологистката Одри Луби од Универзитетот во Флорида објаснува зошто до сега не биле снимени карактеристичните звуци. Таа смета дека веројатно има неколку причини за тоа, вклучувајќи ја и можноста за ослободување во одредено време од годината или време, и дека е веројатно тоа да го прават само одредени видови.
„Тие се многу тешки за изучување бидејќи се многу мобилни и речиси нескротливи“, додава таа.
Истражувањето е објавено во списанието Ecology.