Мино Рајола (53) се грижи за кариерите на Златан Ибрахимовиќ, Ерлинг Халанд, Матијс де Лихт, Пол Погба и Џанлуиџи Донарума, а синоќа беше прогласен за најдобар фудбалски менаџер во Италија.
Италијанците беа најмногу заинтересирани за деталите околу 39-годишниот неуништлив Ибра. Швеѓанецот е главниот играч на Милан, кој во моментов го држи првото место во Серија А.
„Едно не можам да си простам. Направив голема грешка во неговата кариера“, рече Рајола, објаснувајќи:
„Најмногу жалам што го однесов во американски МЛС. Па, тоа беше губење време за него. Жал ми е што не ги помина овие две години во Европа, бидејќи се покажа како неверојатен играч.“
Златан играше за ЛА Галакси во МЛС од 2018 до 2020 година и постигна 52 гола на 56 натпревари. Си играше со противниците и постигна неверојатни голови. Во јануари 2020 година се врати во Милано на иницијатива на Паоло Малдини и Звонимир Бобан. Така, по заминувањето од Манчестер Јунајтед повторно заигра во Европа.
Рајола верува дека Златан може да игра уште пет сезони и во иднина го гледа како прв човек на УЕФА.
„Видов многу играчи кои беа уморни на оваа возраст на која е сега Златан. Тогаш навистина ми е жал што ја продолжуваат кариерата наместо да се пензионираат. Но, не го видов тој умор кај Златан. Во иднина, Златан ќе игра многу важна улога. Можеби како претседател на УЕФА, за да може конечно да промени некои работи во фудбалот.“
Ибра беше прогласен за легенда на годината во Италија, по што се огласи на Instagram. Тој не се пофали себеси, како што обично прави, туку објавата му ја посвети на Рајола.
„Татко, брат, пријател, агент. Мино Рајола е најдобриот од најдобрите и отсекогаш бил најдобар.“
