Капитенот на хрватската фудбалска репрезентација, Лука Модриќ, нема да патува во Лајпциг за натпреварот од 5. коло од групата Ф во Лигата на шампионите против домашната екипа РБ Лајпциг, соопшти актуелниот европски шампион Реал Мадрид.
Реал не објави зошто Модриќ нема да игра утре вечер, иако првично требаше да отпатува за Германија. Но, подоцна се дозна дека Модриќ превентивно нема да игра - се работи за повреда на адукторот, но не станува збор за посериозна повреда.
Модриќ беше стрелец на првиот гол за Реал во саботната победа од 3:1 на домашното првенство против Севиља, а на теренот беше до 77. минута.
Покрај Модриќ, уште претходно за натпреварот со РБ Лајпциг отпаднаа и Карим Бензема и Феде Валверде, кои добија удар во нога на крајот од саботниот првенствен дуел против Севиља.
Реал на две кола пред крајот на групното натпреварување обезбеди пласман во осминафиналето на Лигата на шампионите. Моментално води во Ф групата со 10 бода, РБ Лајпциг е втор со 6, Шахтар е трет со 5, додека Селтик е последен без бодови.
