Овој рецепт за бразилска паста е навистина пребогат со состојки и делува примамливо.
Ако некогаш сакате да се почастите со свечен ручек, а да нема печење, тогаш оваа бразилска паста е добра идеја. Што сѐ нема во тавата, дури и јаболко. Треба да се проба, бидејќи делува навистина вкусно.
Потребни состојки:
- 300 гр фузили
- вода
- 1 лажичка сол
- ½ зелена пиперка
- ½ црвена пиперка
- ½ кромид
- ½ краставица
- 1 јаболко
- 1 зелен лимон
- 1 лажица сенф
- 4 лажици сок од лимон
- 2 лажици маслиново масло
- 1 лажица доматен сос
- 1 лажица соја сос
- 3 лажици мајонез
- сол по вкус
- бибер по вкус
- 150 гр пченка
- 340 гр туна
Подготовка:
Фузилите сварете ги на вообичаениот начин, па исцедете ги (во никој случај не ги полевајте со студена вода). Може да користите и друг вид на паста по ваша желба. Пиперките исечкајте ги на ситни коцки, а истото направете го и со кромидот и краставицата, додека јаболкото на малку покрупни.
Во сад ставете сенф, лимонов сок, маслиново масло, доматен сос, соја сос, мајонез, посолете, побиберете и измешајте за сето тоа убаво да се соедини.
Во друг поголем сад ставете ги исечканите зелена и црвена пиперка, краставицата, кромидот, додадете пченка, јаболкото, исцедете сок од еден зелен лимон и измешајте. Потоа сипете ја смесата која претходно ја подготвивте и убаво измешајте.
Фузилите ставете ги голем сад за сервирање, додадете им маслиново масло и промешајте. Истурете ја подготвената смеса и измешајте. Потоа додадете ја туната и повторно измешајте и ручекот е готов.
