Македонската фудбалска репрезентација мрдна само едно место напред на ноемвриската ранг-листа на ФИФА, објавена денеска.
Месецов „Рисовите“ одиграа два квалификациски натпревари на кои прво запишаа 5:2 дебакл од Италија во Рим, а потоа одиграа 1:1 со Англија во Скопје.
Со оглед на тоа што Англија во моментот беше на високото 4. место на листата, сите очекуваа поголем скок на Македонија, но тоа не се случи, па „Рисовите“ напредуваа едвај незабележително едно место и сега се на 65-тата позиција. Македонија има 3,76 поени повеќе од октомври, односно вкупно 1362,17.
Англија исто така скокна само едно место, но за нив тоа значи влез во топ 3 бидејќи сега се трети. Англичаните првпат по 2021 година се на оваа позиција.
Италија, пак, остана на 9-тото место, кое го држи од септември.
Во топ 10 има мали промени со замена на места на некои репрезентација, но нема промени во однос на тоа кои се внатре бидејќи никој не влезе и никој не излезе.