Резултатите од обдукцијата на милијардерот Џефри Епстин, кој изврши самоубиство во затворската ќелија во Њујорк, покажуваат дека му се скршени неколку вратни пршлени, објави Washington Post.
Повредите упатуваат на тоа дека е обесен или задавен, објави весникот, повикувајќи се на неименувани извор запознаени со резултатите од обдукцијата.
Милијардерот и осуден сексуален престапник, кој чекаше судење поради обвинение за трговија со сексуални робинки, беше пронајден мртов во саботата. Извор за Reuters претходно изјави дека 66-годишниот Епстин е пронајден обесен.
Главниот државен обвинител Вилијам Бар побара оставка од надзорникот на сојузниот затвор и ги осуди сериозните неправилности во таа установа. Медиумите претходно пишуваа дека стражарите го оставиле сам во ќелијата три часа, без да го проверуваат откако имаше претходен обид за самоубиство.
Побарана е истрага за неговата смрт.
