Капитенот на македонската репрезентација беше на денешната прес-конференција и ги искажа своите впечатоци и очеклувања за утрешниот натпревар против Украина.
Стефан Ристовски има голема почит кон репрезентацијата на Украина, за која, како што вели, настапуваат одлични играчи кои играат во големи клубови.
„Украина е една од селекциите која ја сметаат за, во наводници, нефаворити, но по мене според играчкиот кадар се и тоа како фаворити. Се работи за одлична репрезентација која знае што прави и која игра одличен фудбал. Со нив игравме на Европското првенство, а одигравме две различни полувремиња. Направивме грешки кои ривалот ги казни. Ако сакаме да се надеваме на резултат на домашен терен, тогаш ќе мора да одиграме максимално и ни треба еден перфектен натпревар“, рече македонскиот капитен.
„Ако сакаш нешто повеќе со вакви селекции, не може само да се браниш, мора нешто да направиме и во офанзива, да задржиме топка. Во фудбалот сѐ е можно. Ни треба максимален фокус од прва до последна минута. Спремни сме и се надевам со поддршка од навивачите која ќе ни биде ветер во грб ќе дојдеме до позитивен резултат“, додаде.
Македонија и Украина играат в петок од 20:45 на Националнната арена „Тодор Проески“ во Скопје. Билетите се веќе во продажба преку продажната мрежа на MKTickets, а од синоќа работи и билетарницата на стадионот. На денот на натпреварот таа ќе работи до 16 часот.