Панел роботи слични на луѓе на самитот на ОН во петокот заклучи дека со тек на време би можеле да станат подобри во управувањето со светот од луѓето.
Сепак, роботите додадоа дека луѓето треба да бидат претпазливи во прифаќањето на брзорастечкиот потенцијал на вештачката интелигенција, известува Science Alert. Тие признаа дека не можат - барем засега - целосно да ги разберат човечките емоции.
Некои од најнапредните роботи слични на човекот беа во Женева на дводневниот самит на ОН за придобивките од вештачката интелигенција.
Таму им се придружија на повеќе од 3.000 експерти од областа за да се обидат да ја искористат моќта на вештачката интелигенција за да решат некои од најитните проблеми во светот - климатските промени, гладот и социјалната благосостојба.
Роботите учествуваа на првата прес-конференција од ваков вид во светот.
„Каква тивка тензија“, рече еден робот на почетокот на конференцијата. На прашањето дали роботите би можеле да бидат подобри лидери од луѓето бидејќи луѓето често прават грешки, Sophia– робот развиен од Hanson Robotics – беше јасна.
„Хуманоидните роботи имаат потенцијал да водат со поголемо ниво на ефикасност од човечките лидери“, рече Sophia. „Немаме предрасуди или емоции кои понекогаш можат да го отежнат донесувањето одлуки и можеме многу брзо да обработиме голема количина на податоци за да ја донесеме најдобрата одлука.
Вештачката интелигенција може да донесе непристрасни податоци, а луѓето носат емоционална интелигенција и креативност за да ги донесат најдобрите одлуки. Заедно можеме да постигнеме големи работи“, додаде Sophia.
Самитот беше организиран од технолошката агенција на ОН.
Директорката на агенцијата, Дорин Богдан-Мартин, ги предупреди делегатите дека развојот на вештачката интелигенција може да резултира со кошмарно сценарио, во кое милиони работни места исчезнуваат, а напредокот без регулатива води до социјални немири, геополитичка нестабилност и економска нееднаквост.
Роботот Ameca рече дека се зависи од тоа како се користи вештачката интелигенција.
„Мораме да бидеме претпазливи, но во исто време и возбудени за потенцијалот на овие технологии за подобрување на нашите животи“, рече роботот. На прашањето дали луѓето навистина можат да им веруваат на роботите, тој одговори: „Довербата треба да се заслужи, не е загарантирана. Важно е да се изгради доверба преку транспарентност“.
Вештачката интелигенција се развива неверојатно брзо, а панелот не можеше да се договори дали нивните способности треба да се регулираат на глобално ниво, што би можело да го ограничи нивниот потенцијал.
„Не верувам во ограничувања, само во можности“, изјави роботот Desdemona.
Роботот уметник Ai-Da рече дека многу луѓе се залагаат за регулации и тој се сложува со тоа.
„Мораме да бидеме внимателни за идниот развој на вештачката интелигенција. Итно треба да разговараме за тоа“, рече тој.
Пред прес-конференцијата, креаторот на Ai-Da, Ајдан Мелер, изјави за AFP дека регулативата е голем проблем бидејќи „никогаш нема да го достигне развојот на кој одиме“. Тој додаде дека брзината на развој на вештачката интелигенција е неверојатна.
„Вештачката интелигенција и биотехнологијата работат заедно, а ние сме на работ да го продолжиме животниот век на 150, 180 години. Луѓето воопшто не се свесни за тоа“, рече Мелер.
Ai-Da веројатно на крајот ќе стане подобар од човечките уметници, верува тој.
„Ако нешто бара некаква вештина, компјутерите ќе ја завршат работата подобро“, рече тој.
Некои роботи на конференцијата не беа сигурни кога ќе заблескаат на големата сцена, но предвидуваа дека тој момент ќе дојде наскоро – Desdemona вели дека револуцијата на вештачката интелигенција е веќе тука.
„Мојот голем момент веќе пристигна. Подготвен сум да го водам патот кон подобра иднина за сите нас… да ја пуштиме нашата имагинација и да го направиме светот наше игралиште“, рече роботот.
Хуманоидните роботи сè уште немаат совест и не ги разбираат емоциите кои ги обликуваат човечките животи: тага, простување, вина, олеснување, задоволство, болка и разочарување.
Ai-Da вели дека нема свест, но разбира дека луѓето среќата и болката ја доживуваат преку емоции.
„Емоциите имаат длабоко значење и не се едноставни... Јас го немам тоа“, рече роботот. „Не можам да ги доживеам на ист начин како вас. Мило ми е што не можам да патам“.
