„Важно е што пехарот го однесовме дома“, напиша Зебастиан Роде објавувајќи непријатна фотка од неговото чело, небаре бил во некоја гладијаторска битка.
Понекогаш успехот бара голема жртва, а тоа синоќа најдобро го почувствува 31-годишниот капитен на Ајнтрахт од Франкфурт, новиот победник на Лига Европа.
Ајнтрахт славеше над шкотски Ренџерс на пенали откако натпреаврот по 120 минути игра беше 1:1. Но, тоа беа болни минути игра за Роде бидејќи уште во 6. минута доживеа болна повреда.
При еден обид да ја удри топката со глава во неговото чело заврши копачката на Англичанецот Џон Лундстрам. Лицето на Роде набрзо го облеа црвена крв, па следуваше неколкуминутен прекин додека лекарската екипа го средуваше осакатениот Германец.
Роде се врати во игра и остана до 90-тата, кога беше заменет.
Потоа дочека да го крене победничкиот пехар за кој неговите соиграчи се изборија со победа од 5:4 на пенали, каде трагичар беше Арон Ремзи кој беше единствен кој промаши.
Роде на социјалните мрежи објави фотографија од тоа како сега изгледа неговото чело, и напиша: „Важно е што пехарот го однесовме дома“.
И тоа како е важно бидејќи Франкфурт дочека европски пехар прв пат по 1980 година.
