Еден од најдобрите фудбалери на сите времиња, Бразилецот Ромарио, коментираше кој е подобар: Лионел Меси или Диего Марадона? Неговиот одговор нескромно го сврти кон себе.
Тој смета дека Марадона е подобар од Меси бидејќи има освоено Светско првенство, но додаде дека ни едниот, ни другиот не е најдобар.
„Лионел не може да биде подобар, бидејќи Марадона има освоено Мундијал. За да го надмине, мора да го освои пехарот на Светското првенствп. Меси игра добро само за Барселона, а не го прави истото за репрезентацијата на Аргентина“, изјави Ромарио за бразилски Fox Sports.
Меси за Барса има постигнато повеќе од 500 гола, а Марадона во кариерата има дадено 312. Поранешниот бразилски ас, добитник на Златна топка и светски шампион во 1994 година нескромно изјави дека тој е поуспешен од двајцата Аргентинци.
„Тие се одлични играчи, ама јас бев пред нив. Тоа навистина го мислам и го кажувам со голема понизност“, рече Бразилецот кој тврди дека има постигнато 1.000 гола во кариерата, иако статистиката на ФИФА покажува бројка од 929 гола.
Во изборот меѓу Меси и Марадона, тој дава трета опција, намерно или ненамерно, негов сонародник.
„Денес, во однос на тоа како игра и за клубот и за репрезентација, сметам дека најдобар на светот е Нејмар“, рече Ромарио кој изминативе години се занимава со политика.