Ако до сега не сте пробале аспарагус, сега е вистинското време. Ви предлагаме да го направите во сос кој ќе го послужите со бело месо.
Полека завршува сезоната на аспарагус, па сега е вистинското време да го набавите од маркетите или на пазарите. Од него можете да ги направите некои од највкусните јадења, а нашиот предлог е бело месо во сос од аспарагус и грашок. Аспарагусот има специфичен вкус, но не премногу силен, па затоа на секое јадење му дава посебен шмек. Ако сакате ручек што ќе му се допадне на целото семејство, тогаш дефинитивно треба да го испробате овој рецепт.
Потребни состојки:
- ½ шолја брашно
- ½ лажичка сол
- ½ лажичка бибер
- 2 пилешки филеа
- 1 кромид
- 5 чешниња лук
- ½ шолја павлака за готвење
- ½ шолја булјон
- ⅓ шолја сок од лимон
- 230 гр аспарагус
- 200 гр замрзнат грашок
- 1 лажичка сенф
- 1 нишка магдонос
- масло
- пармезан (опционално)
Подготовка:
Измешајте ги брашното, солта и биберот. Месото исечкајте го на тенки шницли, па покријте го и излупајте го со чекан за месо. Валкајте го месото во брашното, па пропржете го во тава во која претходно сте загреале малку масло. Извадете го месото од тавата, избришете ја со хартиена крпа, па ставете уште малку масло, додадете сечкан кромид, пржете додека не омекне и потоа додадете крупно сечкан лук. Потоа сипете ја павлаката за готвење, булјонот и лимоновиот сок. Гответе додека не почне да врие, па оставете го уште две минути за да се намали течноста. На аспарагусите исечете им ги краевите и додадете ги во сосот, како и замрзнатиот грашок. Измешајте и гответе додека не омекнат. Потоа додадете сенф и сечкан магдонос и посолете. Промешајте, па сосот прелијте го преку месото. Ако сакате на крајот можете и да посипете малку пармезан.
Бон апетит!