Министерот за одбрана на САД, Лојд Остин, одржа прес -конференција во Брисел, каде се сретнаа министрите за одбрана на НАТО за да разговараат за тоа како да ѝ помогнат на Украина во војната против руската инвазија.
На почетокот на обраќањето, тој рече дека светот од 24 февруари „ќе ја одбележи мрачната годишнина“ од почетокот на руската инвазија.
„Нашите срца се со сите украински семејства кои беа убиени и ранети обидувајќи се да го одбранат својот суверенитет. Тие ги загубија своите деца, родители и најблиски затоа што Русија намерно гаѓа граѓански цели“, рече Остин, додавајќи: „Русија наметна една година трагедија и терор на Украина, но украинскиот народ го инспирираше светот“.
Министерот за одбрана на САД вели дека Соединетите Американски Држави и сојузниците „се грижат Украина да има сè што ѝ треба и кога ѝ треба„ додавајќи дека „сојузниците ѝ дале на Украина оружје и опрема за повеќе од осум борбени бригади“.
„Но, како што реков минатиот месец во Рамштајн, овде не се работи за еден вид оружје. Се работи за испорака на она што го ветивме. Станува збор за интеграција на сите овие системи“, рече Остин, додавајќи дека тие работат со Украинците „за да им помогнат да ја добијат борбата за слобода“.
„Путин претпоставуваше дека Украина ќе биде лесна цел. Тој претпостави дека Киев ќе падне брзо. Погреши за сè“, рече Остин, додавајќи дека „Руската војска ја плати огромната цена на агресивната војна и сега е сведена на испраќање регрути и затвореници во неизбежна смрт“.
Тој рече дека обуката на украинските сили „останува клучна“ во напорот на сојузниците за да ѝ помогне на Украина на патот кон победата, додавајќи дека очекува Украина напролет да започне офанзива против руските сили на неговата територија.
„Украина сака да создаде импулс, очекуваме офанзива во текот на пролетта. Русите постојано носат нови сили на фронтот, но тие се слабо опремени и слабо облечени“, рече Остин, додавајќи дека членките на НАТО се залагаат за „отфрлање на Путиновата визија за светот – свет на хаосот“ и дека „долгорочно ќе ја поддржуваат Украина“.
Министерот за одбрана на САД изјави дека е приоритет за него и неговите колеги да обезбедат дека западните донации за Украина „се користат на начинот на кој било предвидено“.
