Потегот треба да го ублажи ударот на западните санкции по руската економија по повлекувањето на Visa и MasterCard од Русија.
Во неделата неколку руски банки објавија дека имаат намера да почнат да издаваат картички преку кинескиот UnionPay (银联) систем за кредитни и дебитни картички.
Овој чекор доаѓа кратко откако Visa и MasterCard одлучија да ги замрзнат своите активности во Русија и да ги исклучат сите руски банки од нивниот систем на наплата. Преку UnionPay корисниците на Visa и MasterCard картички ќе можат да добијат нови и да ги користат за плаќања и повлекување пари како во Русија, така и во странство.
Во саботата меѓународните даватели на финансиски услуги Visa и MasterCard објавија дека донеле одлука да ги замрзнат своите операции во Русија и тоа во наредните неколку дена, со тоа придружувајќи се на низата санкции кои Западот ѝ ги наметнува на Русија поради воената интервенција во Украина. Со овој чекор граѓаните кои поседуваат Visa и MasterCard картички издадени во Русија нема да можат да ги употребуваат надвор од земјата. Воедно, нивните картички издадени во други земји нема да бидат употребиви во Русија.
Visa и MasterCard се само два од низата светски брендови кои се повлекуваат од рускиот пазар поради вооружениот конфликт во Украина. Претходно компании како PayPal, Netflix, Intel, Inditex, Airbnb и Rolls Royce објавија нивно повлекување.
Руските банки, вклучително и најголемата Сбербанк, како и Альфа-банк и Тинькофф Банк веќе објавија дека се префрлаат на UnionPay. Со овој кинески оператор од претходно соработка веќе имаа помали банки како Почта Банк, Газпромбанк, Промсвязьбанк, Совкомбанк и други.
UnionPay е меѓународен давател на финансиски услуги основан во 2002 година, а доби меѓународен статус во 2005. Седиштето е во Шангај, а компанијата е раширена во над 180 земји во светот вклучувајќи ги и Грција, Србија, Хрватска, Унгарија, Австрија, Швајцарија, Германија, Шпанија, Италија, Полска, Португалија, Израел, Мексико, Тајланд и Индија.