Англискиот селектор призна дека тој ја составил листата на изведувачи на пенали кај Англија и понесе одговорност за нивните утки.
Поведоа уште во втората минута, а на крајот загубија на пенали. Англија денеска тагува откако синоќа во своето прво европско финале не успеа да го зграпчи големиот пехар и тоа само поради лошо изведување на пенали.
„Многу сме разочарани. Прво, играчите ја заслужуваат секоја пофалба бидејќи дадоа сѐ што можеа на првенствово. Сега беше исто, се отепаа од трчање по теренот. На моменти игравме добро, на моменти топката не ја држевме доволно долго, особено на почетокот од второто полувреме. Но, не смеат да бидат обвинувани. Апсолутно ми претставуваше голема радост да работам со нив и тие стигнаа толку далеку после многу долго време. Но, се разбира, оваа вечер беше неверојатно болно во нашата соблекувална“, вели Гарет Саутгејт во интервју за BBC.
Саутгејт мораше да одговара и на неизбежните прашања за тоа што пред самиот крај во игра ги стави Маркус Рашфорд и Џејдон Санчо само за да шутираат пенали, а двајцата промашија. Потоа Букајо Сака го промаши последниот одлучувачки пенал.
„Тоа паѓа на мој грб, јас ги одбрав изведувачите на пенали според она што го прикажуваа на тренинзите, никој не беше оставен сам на себе. Досега победувавме заедно како тим и сега сите заедно не успеавме да победиме, а што се однесува до пеналите тоа беше целосно моја одлука и затоа тука вината е само моја“, објаснува тој.
Англија беше одлична цело првеснтво. Не загуби ниту еднаш, а прими само два гола од кои еден од слободен удар, а само во финалето мрежата ѝ ја затресоа од игра кога по еден карамбол Леонардо Бонучи се најде на вистинското место.
„Остануваме заедно, момците ѝ дадоа на земјата некои незаборавни моменти, иако оваа ноќ е екстремно тешка за сите нас. Едноставно мора да се чувствува таа разочараност бидејќи шансите за трофеј како оваа се многу ретки во животот. Но, кога играчите ќе се погледнат себеси и ќе видат што направиле, треба да бидат навистина горди на себе“.
„Во моментов болката за поразот е огромна, сакавме на нашата нација да ѝ подариме уште една посебна ноќ и прва титула европски шампиони, но не успеавме во тоа“, заврши англискиот селектор.
Саутгејт ја препороди Англија. На Мундијалот во Русија го освои 4. место, а сега загуби во финале. Дефинитивно тој е човекој кој ќе ја предводи репрезентацијата и на Мундијалот во Катар наредната година.