Финалето на овогодинешното издание на Копа Италија ќе се игра на „Олимпико“ во Рим, вечерва од 21 часот по средноевропско време.
Само во редовите на Јувентус има еден суспендиран играч и тоа десниот бек Матиа Де Шиљо, поради акумулирани жолти картони.
Листатa на повредени играчи е нешто подолга. Кај Јуве во аут до крајот на сезоната се напаѓачот Федерико Кјеза, играчот од средниот ред Вестон МекКени и младиот напаѓач Кају Жоржи, додека кај Интер тоа е централниот дефанзивец Алесандро Бастони. Неизвесни, но со шанси да се настапат, барем од клупата, се Алекс Сандру и Лоренцо Пелегрини кај Јуве, додека Милан Шкриниар, Матиас Весино, Марцело Брозовиќ и Лаутаро Мартинес кај Интер.
Традиционално пред секое финале Италијанците прават фешта со интонирањето на државната химна „Il Canto degli Italiani“ (Песната на Италијанците) позната и како „Inno di Mameli“ (Химна на Мамели) според творецот на химната, Гофредо Мамели, или „Fratelli d'Italia“ (Браќа на Италија) според воведниот стих. Овој пат честа да ја отпее ќе ја има италијанската пејачка и актерка Розалба Пипа, позната под уметничкото име Ариза (Arisa). Неа ќе ја придружува оркестарот на карабинерите.
На територијата на Македонија финалето ќе може да се гледа на ArenaSport 1 Premium, за жал без македонски коментатор, а ќе се пренесува во вкупно 170 земји од 35 различни канали. На стадионот околу 40 камери ќе се обидат да го уловат секој детаљ од натпреварот.
Ќе се изврши и експериментирање (со технолошкиот партнер Hawk Eye) на таканаречената технологија Virtual Recreation што ќе му овозможи на крајниот корисник да прегледува повторувања на акции во зголемена реалност (како во видео игрица), вклучувајќи и напредни статистички податоци и податоци за следење во комбинација со видео.
Правдата ќе ја дели Паоло Валери од Рим, а ќе му помагаат Алесандро Џалатини (од Рим) и Фабиано Прети (од Мантова), додека четврти судија ќе биде Симоне Соѕа (од Серењо). Во ВАР собата ќе командува Алеандро Ди Паоло (од Авецано), а ќе му помагаат Розарио Абисо (од Палермо) и Салваторе Лонго (од Паола).
Во случај по 90 минути игра да нема победник ќе се играат продолженија од двапати по 15 минути. Доколку повторно нема победник ќе се изведуваат пенали, на почетокот по 5 серии, а потоа по една сѐ додека не се добие победник.
Двата тима имаат право да стават 12 играчи на клупата за резерви, од кои двајца мора да бидат голмани. Во текот на регуларните 90 минути секоја екипа има право на 5 замени и тоа направени во максимум 3 различни временски интервали, не сметајќи го полувремето. Во продолженијата од двапати по 15 минути дозволена е и шеста замена.
Двата тима одиграа само 3 рунди или вкупно 4 натпревари на патот до финалето, бидејќи почнаа од осминафиналето. И двата не претрпеа пораз.
Јувентус:
Сампдорија 4:1
Сасуоло 2:1
Фиорентина 1:0, 2:0 (3:0 вк.)
Интер:
Емполи 3:2 (прод.)
Рома 2:0
Милан 0:0, 3:0 (3:0 вк.)
Јувентус со 14 тутули е најтрофеен во Копа Италија, а има и 6 порази во финалињата. За него ова ќе биде вкупно 21 финале. Последен пат Јуве го освои ова натпреварување лани, што значи дека е бранител на тронот.
Интер е трет по бројот на освоени пехари со 7, а има и 6 порази, односно вечерва ќе го игра своето 14-то финале. Последен пат Интер го крена овој пехар во 2011 година.
Натпреварите помеѓу Јувентус и Интер важат за најголемо дерби на Чизмата, но изненадувачки досега само двапати овој натпревар бил финале, и тоа во далечните 1959 и 1965. Тогаш во двата наврата победил Јувентус.
Тековнава сезона по дури четврти пат ќе се игра ова дерби откако двапати се играше во Серија А и еднаш во Суперкупот на Италија.
Вкупно 244 пати се играло ова дерби, сметајќи ги сите официјални натпреварувања. Јувентус има 110 победи, Интер има 74, додека 60 натпревари завршиле нерешено. Гол-разликата од 346:300 е на страната на „Старата дама“.
Тројца играчи го делат врвот на листата најдобри стрелци на ова големо дерби. Со по 12 голови тоа се легендарните Џузепе Меаца (за Интер), Омар Сивори (за Јуве) и Роберто Бонинсења (9 за Интер и 3 за Јуве). Од играчите кои се во комбинација за вечерва само Чилеанецот Артуро Видал од редовите на Интер е меѓу првите 14 на оваа листа со 4 гола (3 за Јуве и 1 за Интер).
