Олаф Шолц и Емануел Макрон вчера изразија единство за помошта за Украина на самитот во Берлин со полскиот премиер Доналд Туск, по неколкунеделни тензии околу стратегијата што треба да се усвои кон Москва.
„Денес, повеќе од кога било, нашето единство е нашата сила, а пред сè нашите три земји Германија, Полска и Франција сносат посебна одговорност“, рече германскилот канцелар.
„Конкретно, ќе купиме уште повеќе оружје за Украина на целиот светски пазар“, рече тој по средбата.
Трите земји се „обединети“ и „решени никогаш да не дозволат Русија да победи и да го поддржат украинскиот народ до крај“, истакна францускиот претседател.
„Ќе продолжиме како што правевме од првиот ден, никогаш нема да преземеме иницијатива за каква било ескалација“, додаде тој како да ги уверува своите сојузници по изјавите од февруари за можно испраќање војници во Украина.
Оваа средба требаше да ја затвори фазата на несогласувања што следеше по конференцијата за поддршка на Украина во Париз на 26 февруари, што ја ослабна пораката за единство на Западот кон Москва.
Олаф Шолц категорично ја отфрли можноста за испраќање војници на украинска територија.
Несогласувањата дополнително се зголемија минатата недела кога Емануел Макрон во Прага рече дека Европа е во момент „во кој не би било соодветно да се биде кукавица“.
Посредувањето на Доналд Туск можеби помогна да се смират тензиите, проценува францускиот печат.
Полскиот премиер, поранешен претседател на Европскиот совет, ги отфрли „злонамерните гласини“ за несогласувања.
Тројцата лидери, кои се среќаваат во формат познат како „Вајмарски триаголник“, ќе се сретнат на самитот на ЕУ во Брисел на 21 и 22 март, а потоа и во Полска на почетокот на летото, најави Доналд Туск.